بنت حلوة شكل هادي ركبت من ابو الفدا
المشكلة ان الصوت ياما عكر الهدوء
و الشباب في الزحمة قاموا لما شافوا البنت زوق
قالوا هيلا بيلا صيدا يلا بينا نبتدي
مهما كان الفعل جارح هي مش هتشتكي
المحترم اللي فيهم شارك بس بالكلام
مع ان كلامه جارح بس زايط و السلام
موقف مهين اصل كل الناس ساكتين
اللي شايف واللي سامع و اللي راكب من الحسين
قاعد طول السكة ساكت شارك بس بالعنبن
شئ يحزن حاجة تقرف ان كل الخلق عادي
اللي عامل فيها سارح و اللي بيسمع للمنادي
كله عادي لو هيبقي حد راضي
كله راضي ان الغدر يبقي عادي
و يترمي حمل العتاب علي البنات و علي الاهالي
ليه بنرضي و مش بننطق هو ده دايماً سؤالي
وسط كل بيت حكاية متحكتش من الكسوف
وسط كل بيت حبيبة شايفة بكرا كله خوف
مين السبب لو في يوم الغدر طال كل البيوت
مين السبب لما الحبيبة تصرخ ان مفيش حلول..مفيش حلول
كنت فاكر السعادة حاجة متحددة
نفس البنت تاني يوم ركبت من ابو الفدا
خط زحمة اكوام و لحمة اكشن عيد القصة تاني
بابتسامة صفرا بادئ قال يقول كلام اغاني
اه يا حلو ياللي واقف يلا بينا ولا ايه؟
من البداية البنت ثارت هو ده يبقي اسمه ايه!!
هو ايه مفيش شهامة ! ابعد عني عايز ايه؟!
صوتها يعلي و من بجحته رد كان الصوت صوتين
قالها مجتش جنبك كله شايف ايدي فين
الامل عمال بيضعف ان حد يقوم يساعد
واضح كله ساكت علي المشاكل كله باعد
قالت عيب علي الشناب و علي الدقون اللي موجودة
فين النبل يا جدع فين النخوة و الرجولة
قام الكل قام و شاخط بصوا طولت اللسان
زعلوا منها لما سمعوا صوت الحق في الودان
زعلوا منها لما سمعوا صوت الحق في الودان!
-زاب ثروت
ليست هناك تعليقات:
إرسال تعليق