فى ناس ماتت علشان تعبر وترفع يابلد اسمك
وناس عاشت علشان تهبر وتنهش حتة من جسمك
في ناس حاربت علشان عرضك روت من دمها ارضك
وأدت يا وطن فرضك بدون لحظة ماتتردد
فى ناس ماتت علشان مبدأ سنين بسلاحها فى الخندق
ومين ممكن يكون اصدق من اللى علشانك استشهد
فى ناس ماتت بلا زفة وسابت مصرنا واقفة
ولو يتحط فى الكفة بطل منها بجيش كامل
لاتعرف يعنى اية تتطبيع ولا معنى انك انت تبيع
تاريخ امة خلاص بيضيع بـ وهم اسمه سلام شامل
فى ناس قضت على الجبهة سنين مكوية بلهبها
تاريخنا عمره ما جابها ولا سجل حكايتها
لاسألت عن مكاسبها ولا العيلة اللي هتسيبها
ولا كانت بتحسبها وضحت راضية بحياتها
فى ناس حاربت ومش عايزة ولا تكريم ولا جايزة
وقابلت ربها فايزة بجناته ورضوانه
وناس عاشت عشان تحرق وطن وفـ ثروتة تسرق
وجاهزة تهج لو يغرق فلا عاشوا ولا كانوا
فى ناس لاجل البلد صنعت ملامح نصر بيه رفعت
رقابنا فوق وما طمعت فـ مال يا مصر او شهرة
فى ناس لاجل البلد قاست وفوق المستحيل داست
وناس من بعدها عاثت فساد في ارضك الطاهرة
من الشهدا فى عبور الجبش
الى الشهدا فى طابور العيش
سنين فاتت وماقدرتيش تصونى نصرك الغالى
فى ناس سرقت ثمار النصر
وباعت كل حاجة فى مصر
وخلتنا نعيش فى عصر
مهيش بلدى وانا مالى
وانا مالى ...
ليست هناك تعليقات:
إرسال تعليق