بنزول المياة في الكوباية انا بدأت افهم..
فاشفت النص الفاضي منها فاستغربت بضحك..
بضحك على الايام الي عدت في الحزن و اليأس
كأني و انا شايف نصها المليان .. فلا بأس
عادي .. مش مهم.. عدت مش هاتكسر
عرفت اسباب كتير علشانها لازم ابتسم
و شفت ازاي بكلمة واحدة .. البسمة ممكن تترسم
زيّ..
كل سنة و انت طيب..
مبروك..
نورتنا..
يا ريت نشوفك تاني و تبقى واحد مننا
و اديني بفتكر و ازاي انا كنت بشتكي و اقول ده عمر عدى و عمر فات..
ده احنا لسة بنبتدي
فاكرين ؟ فاكرين اجازة آخر السنة كل سنة ؟
و حلاوة النجاح لما ننجح انت و انا ؟
انا فاكر المحبة .. والعشرة و الصحاب
و الكورة الساعة ستّة ... و الشورت و الشراب
و حوش المدرسة في الفسحة مليـــان صحاب
و الشنطة قاسمة ضهري .. و فيها مليون كتاب
انا فاكر عيد ميلادي ... و التورتة و الشموع
و اللعبة دي عايزها و اقعد اعيط بالدموع
و عيد ورا عيد بيجي.. طب فين العيدية ؟
يا بخت عم محمد البقال الي تحتيا :'D
ونجاح سنين يعدي .. تعب سهر تحدي
و مين كان معايا .. و مين وقف ضدي
فا مهما الدنيا زعلتنا لازم نبتسم
لازم نفتكر الحاجات الي بتخلينا فرحانين
نفتكر الصحاب.. نفتكر الناس الي احنا بنحبهم ... نفتكر اي نجاح وصلناله
و نقول الحمدلله ..
و عيش حياتك بروح الطفل الي جواك ... وخلي الابتسامة حاجة مش مفرقاك
ليست هناك تعليقات:
إرسال تعليق