الحفلة زحمة مليانة وشوش كتير
اعرفها
خلان و اعمام و اسامي لسه صعب انطقها
عشرة و محبة واضحين مابين الناس حوليا
بيقولوا ده عيد ميلادي الحفلة دي معمولة ليا
مابين كتير هدايا كان جواب مبعوت لاسمي
مكتوب عليه بخط امي .. لحبيبي ابني
طب ليه جواب مانتي جنبي ديما طول الوقت
بلاش لماضة بقى افتح جوابك لو سمحت
قالتلي في الجواب كل سنة و انت زيّ
مانت جوا قلبي في المكانة ملكش زيّ
تكبر و اشوفك زي ما انت عايز تبقى عايز
كدة او كدة حبيبي و لكلام جوابي حاسس
وكبرت اكبر و سنيني زادت عن صوابعي
عصبي و صوتي عالي امي خافت يبقى طبعي
فقالتلي يابني خلي بالك ديما من كلامك
الكلمة سيف يا تقل منك يا تزيد مقامك
و فـ يوم رجعت من المدرسة متبهدل من التراب
وسألت ازاي الغدر ممكن يجي من الصحاب !
و حكيتلها الخناقة و سمعتني بكل صبر
و قالتلي اما تهدى ابقى اقرأ من اول سطر
كانت كتبالي جواب عن الصحاب و الجدعنة
و قالتلي اختار اللي يقول احنا بدل مايقول انا
و اعرف ان الصحاب لا بالكترة ولا بالعدد
في الشدة هما اتنين تلاتة عليهم تعتمد
في السما بشوفك لما الدنيا بيا تضيق ..
و في الليل بحكيلك عن كل قديم و جديد ..
في غيابك ديما جنبي ... كلامك محفور فــ قلبي
رسالتك مش بس كلام .. رسالتك انسان اكونه
و كبرت اكتر و الدنيا كبرت اكتر بيا
و بدأت احس جوا ميني احساس جديد عليا
فحكيتلها عن احلى بنت في الجامعة كلها
وصفتها لامي و قلت مشوفتش زيها
مش عارف اقوللك ايه بس شكلي بحبها
قالتلي احكيلي اكتر قوللي اسمها
مش عارف .. ومتضحكيش عليا انت كمان
متسرع على طول مدلوق من صغري من زمان
فقالتلي اهم حاجة لما تحب لازم تقدّر
تعرف قيمة حبيبتك و لاحلامها اياك تكسر
متستعجلش ! قول الكلمة لما تحسها
اوعاك تخبي حاجة عنها ديما قوللها
عدت سنين كتير و شوفتي ولاد ولادك
رغم الفراق مابيننا عمر ما عيد ميلادي فاتك
بتيجيني فـ كل فرحة و برضو لما تضيق عليا
انا مش مصدق ان عمري مشوفتكيش بعنيا
ربي اختارك تكوني جنبه و انا لسه في اللفة
اكيد مكانك احلى و انا مبصوتلك انت عارفة
فكتبت ليا وحدي يجي الف جواب و قصة
بتحاولي تعوضيني عن الي فاتني واللي لسه
بس انت بتوحشيني بتمنى تكوني قربي
طول عمري بحس بيكي فكان نفسي تحسي حبي
سمعاني اكيد يا امي و اكيد كمان شايفاني
لو مش شايفك بعيني فا قلبي شايفك من مكاني
في السما بشوفك لما الدنيا بيا تضيق ..
و في الليل بحكيلك عن كل قديم و جديد ..
في غيابك ديما جنبي ... كلامك محفور فــ قلبي
رسالتك مش بس كلام .. رسالتك انسان اكونه
ليست هناك تعليقات:
إرسال تعليق